公民黨(香港) | 全台葬儀社評價

公民黨（英文：Civic Party）係香港一個政黨，2006年3月19號成立。創黨黨魁係資深大律師兼前立法會議員梁家傑，而前任黨魁就係大律師兼立法會議員楊岳橋，副主席分別係大律師兼前立法會議員陳淑莊同註冊社工賴仁彪。

公民黨由四十五條關注組成員發起，主要成員重有以黎廣德為代表，活躍於公民社會嘅非政府組織成員、大學學者、另加幾名香港專上學生聯會（學聯）成員同立法會議員籌組而成。成員包括6名立法會議員（余若薇、張超雄、吳靄儀、湯家驊、梁家傑同埋譚香文），7名區議員，黨員人數大概400幾人，係立法會第四大黨。

公民黨嘅黨綱包括爭取普選、爭取立法保障市民獲取資訊自由、推動政黨政治、贊成各行各業全面設立最低工資及最高工時，並以發展成執政黨為目標。黨員梁家傑參加過2007年香港行政長官選舉，但最後輸畀曾蔭權。

籌組時畀外界認為會係民主派嘅右翼，但當佢哋訂出「消除貧窮、公平貿易、爭取社會公義」嘅政策綱領後，重要求全面實施最低工資，就開始畀外界標籤做「共產」、「左傾」同「搞福利主義」。《壹周刊》社評〈壹觀點〉更批評公民黨「政府要有明確而穩定的長遠經濟政策」係以社會主義為取向，搞計劃經濟；又批評公民黨累進稅制、財富再分配、最低工資嘅主張[1]。不過，而家壹傳媒旗下刊物幾乎唔再批評公民黨。

黨徽以綠、白、紫三色綫條圖案為主，象徵爭取普選，意念係嚟自廿世紀初，美國婦女爭取全民普選運動。當時美國嘅運動口號係「畀女人投票權」（Give women vote），所以用口號中三個字嘅第一個字母，重用咗綠（Green）、白（White）同紫（Violet）三色，做象徵爭取普選嘅顏色。當時爭取普選嘅美國婦女，就經常戴呢三種顏色嘅珠寶[2]。

黨徽面世時，吳靄儀形容圖案有如「左手攀日月、右手抱嬰兒」，就係表達喺接觸中上階層人士之餘，亦不忘照顧社會嘅弱勢社群。黨徽由黨員Freeman設計，而「為公為民，香港精神」嘅口號，就係由湯家驊唸出嚟[3]。